Жәңгір хан университетінің студенттері «Pizza Pitch» стартап-жобалар байқауының жеңімпазы атанды

Орал қаласында «Batys Hub» инновациялық орталығының ұйымдастыруымен «Pizza Pitch» байқауы өтті.

Облыстық деңгейдегі байқауға Жәңгір хан университетіндегі «ақпараттық жүйелер және технологиялар» мамандығының студенттерінен құралған «Neuralese» тобы қатысып, І орынға ие болды.

Цифрландыру және жасанды интеллект жылына орай ұйымдастырылған стартап-жобалар байқауында университет намысын топ мүшелері Елер Брманов пен Ернар Мерханов қорғады.

Айта өтейік, «Neuralese» – код жазбай және күрделі математикалық есептеулерді қолданбай-ақ, нейрондық желілердің құрылымы мен жұмыс істеу принциптерін үйренуге мүмкіндік беретін жасанды интеллектті оқытуға арналған визуалды әрі интерактивті платформа.

Қоса кетсек, университет студенті Елер Брманов – ҚР Президенті стипендиясының иегері, сондай-ақ халықаралық, республикалық және облыстық деңгейдегі түрлі байқаулар мен жарыстардың жеңімпазы әрі жүлдегері. Сонымен қатар Батыс Қазақстан облысының түрлі салаларына енгізілген инновациялық жобалардың авторы.

Ал Ернар Мерханов – Польшада білім алуға арналған республикалық гранттың иегері. Сонымен бірге халықаралық «nFactorial Incubator» бағдарламасын сәтті аяқтаған студент. Әрі ол – робототехника бағыты бойынша облыстық деңгейдегі жарыстардың жүлдегері.